اسلام آباد۔12اکتوبر(اے پی پی) وفاقی وزیر منصوبہ بندی ، ترقی و خصوصی اقدامات پروفیسر ڈاکٹر احسن ا قبال آکھیے شنگھائی تعاون تنظیم (ایس سی او) دے سربراہ اجلاس دا انعقاد پاکستان دے عالمی سطح تے مثبت تشخص کوں نشابر کریسی ۔ ھک سیاسی جماعت دی طرفوں ایجھے موقع تے احتجاج دی کال ݙیوݨ ملک دشمنی دے مترادف اے، اےجماعت کہیں ایجنڈے تے کم کریندی پئی اے ایندا جواب ݙیوݨا ہوسی ۔ میڈیا نال ڳالھ کریندے انھاں آکھیے پاکستان سانڳے وݙے اعزاز دی ڳالھ اے جو او 15 اتے 16 اکتوبر کوں ایس سی او سربراہی اجلاس دی میزبانی کریندا پئے ، ایں کانفرنس اچ 9 ملکاں دے سربراہان جیں اچ چین اتے روس دے وزرا عظم وی تشریف گھن آندے پئن ایں توں انڄ وسط ایشیائی ملکاں دے نمائندے وی شرکت کریندے پئن ، سعودی عرب دے وزیر سرمایہ کاری سعودی کاروباری شخصیات اتے سرمایہ کاراں دے رلے ݙو پاسے تعلقات مستحکم بݨاوݨ تے ملک اچ سرمایہ کاری دے نویں موقع ڳولݨ سانڳے پاکستان دے دورے تے ہن تے اہم ملاقاتاں تے معاہدیں دا سلسلہ جاری اے ۔ ایں موقع تے ھک واری ول تحریک انصاف ایں ساری پیشرفت کوں ثبوتاژ کرݨ سانڳے احتجاج دی کال ݙتی اے ، ایس سی او دے سربراہ اجلاس دے ذریعے اساں پاکستان کوں یورپ اتے ایشیا دے سفارتی منظرنامہ تے نشابر کرسڳدوں تے پاکستان دے سانجھے تے تجارتی تعلقات ودھا سڳدوں ، انھاں آکھیے چین دے وزیراعظم شنگھائی تعاون تنظیم دے اجلاس اچ خصوصی طور تے شریک تھیسن جیڑھا جو پاکستان سانڳے اعزاز دی ڳالھ اے ، اعلیٰ سطحی وفد دی آمد نال پاکستان دی معیشت کوں دوام ملسی ۔ ھک ودھیک ݙینھ پاکستان نال ݙو پاسے تعلقات ودھاوݨ سانڳے وی رکھیے ، 14 اکتوبر کوں چینی اتے پاکستانی قیادت وچال چین اتے پاکستان وچال تعلقات تے ڳالھ مہاڑ دے ادوار تھیسن، ایں توں پہلے چین دے وزیراعظم دورہ پاکستان 11 سال پہلے کیتا ہئی ۔ اے ساݙا فرض اے جو چین اتے ٻئے ملکاں توں آوݨ آلے مہمان گرامی دی میزبانی چنڳے طریقے نال کروں جیں توں پاکستان دے وقار اچ ودھارا تھیسی۔
.jpg)