اسلام آباد۔2نومبر (اے پی پی):سپریم کورٹ نایاب عمرانی ازخودنوٹس کیس دی سماعت ھک مہینے کیتے ملتوی کریندے ہوئیں ایڈیشنل ایڈوکیٹ جنرل بلوچستان کوں ذاتی طور تے نایاب عمرانی دے مالی معاملات حل کرݨ دا حکم ݙے ݙتے ۔ عدالت عظمی رجسٹرار سندھ ہائیکورٹ اتے رجسٹرار اسلام آباد ہائیکورٹ توں وڈیو لنک سہولت متعلق جواب جمع منڳدے ہوئیں قرار ݙتے جو رجسٹرار سندھ ہائیکورٹ اتے رجسٹراراسلام آباد ہائیکورٹ وڈیو لنک سہولت متعلق جواب جمع کراون۔ منگل کوں جسٹس عمر عطا بندیال دی سربراہی اچ ترائے رکنی بنچ کیس تے سݨیج کیتی ۔ دوران سݨیج جسٹس عمر عطا بندیال نایاب عمرانی کوں الویندے ہوئیں ریمارکس ݙتن جو تساݙے ایں کیس توں اوکھ پیدا تھیندی پئی اے ،تساݙے خاندان دے کتنے لوک قتل تھئن ۔ جیں تے نایاب عمرانی عدالت کوں ݙسایا جو میݙی والدہ، بھیݨ ، بھرا تے بھابی کوں مترائے بھراویں قتل کیتے ۔ ایں دوران جسٹس سجاد علی شاہ نایاب عمرانی کوں مخاطب کریندے ہوئیں ریمارکس ݙتے جو مسئلہ اے ہے جو قتل کیس ہݨ وی ذیلی عدالتاں اچ چلدا پئے ، سپریم کورٹ اچ ٻہہ تے جیکب آباد سیشن کورٹ دے انڈر ٹرائل کیس متعلق حکم نی ݙے سڳدے ، تساکوں جتھاں بیان ریکارڈ کراوݨا ہووے ونڄ سڳدو ،عدالت عظمی متعلقہ علاقیں دے ایس پی پولیس کوں تساکوں تحفظ ݙیوݨ دا حکم ݙے سڳدیاے، ایں موقع تے نایاب عمرانی موقف اپنائے جو میݙٰی بھیݨ کوں پولیس پروٹیکشن اچ ہی قتل کیتا ڳیا ہئی ،میں اپݨے خاندان دی واحد فرد بچی ہاں جے جیکب آباد ڳئی تاں میکوں وی مار ݙیسن ، اپݨی بھیݨ دے قتل دی گواہ خود ہاں ، عدالت توں درخواست اے کیس اتھاں ٹرانسفر کرݙیون ۔ جیں تے جسٹس عمر عطا بندیال ریمارکس ݙتے جو رجسٹرار سندھ ہائیکورٹ کوں حکم ݙٰیندوں جو اسلام آباد اچ بیان ریکارڈ کرݨ کیتے ویڈیو لنک دا انتظام کرن۔ عدالت عظمی رجسٹرار سندھ ہائیکورٹ اتے رجسٹرار اسلام آباد ہائیکورٹ توں ویڈیو لنک سہولت متعلق جواب جمع کراوݨ دا حکم ݙیندے ہوئیں کیس دی سماعت ھک مہینے کیتے ملتوی کرݙتی ۔سپریم کورٹ ایڈیشنل ایڈوکیٹ جنرل بلوچستان کوں ذاتی طور تے نایاب عمرانی دے مالی معاملات حل کرݨ دا حکم وی ݙتے ۔
.jpg)
