اسلام آباد۔9اکتوبر(اے پی پی)وزیر خارجہ بلاول بھٹو زرداری جرمن وزیر خارجہ اینالینا بیئربوک دے سݙے تے 6 اتے 7 اکتوبر دی رات جرمنی دا دورہ کیتے۔ دفتر خارجہ موجب برلن اچ وزیر خارجہ اپݨی جرمن ہم منصب نال وفود دی سطح تے ملین۔ انہاں ݙو طرفہ تعلقات دا جائزہ ڳھدا اتے مشترکہ دلچسپی، علاقائی و بین الاقوامی امور تے وی الایا۔ وزیر خارجہ بلاول بھٹو زرداری پاکستان دی جرمنی سنڳت اتے تعاون کوں خراج تحسین پیش کریندے کثیر جہتی تعاون بالخصوص تجارت، سرمایہ کاری، تعلیم اتے توانائی دے شعباں اچ اشتراک کار کوں ٻیا تکڑا کرݨ دا آکھی۔ انہاں سیلاب دی صورتحال اچ ہتھ ونݙاوݨ تے جرمنی دا شکریہ ادا کریندے ایں آفت موسمیاتی تبدیلی اتے غذائی تحفظ جھیں مشترکہ چیلنجز نال نمٹݨ کیتے رل تے کم کرݨ تے زور ݙتا۔ انہاں اہم ملاقاتاں کیتن اتے کٹھی پریس کانفرنس وی کیتی جیندے اچ ݙو طرفہ تعاون توں ڳھن تے غیر قانونی بھارتی مقبوضہ جموں و کشمیر اتے افغانستان سودھا علاقائی اتے عالمی مسلیاں تے الایا۔ جرمنی سیلاب متاثرین دی امداد کیتے ٻئے 10 ملین یورو ݙویݨ دا اعلان کیتا۔ وزیر خارجہ جرمن پارلیمنٹ دے ایوان بالا دے صدر بوڈو رامیلو نال وی ملین، پارلیمانی تبادلیاں دے ودھارے، پاکستان اچ سیلاب متاثرین کوں امداد پچاوݨ، افغانستان دی صورتحال اتے پاکستان دے جی ایس پی پلس سٹیٹس کیتے جرمنی دے تعاون تے وی الایا۔ وزیر خارجہ بلاول بھٹو زرداری برلن اچ پاکستانی سفارت خانے ونڄ تے ڈیجیٹل ٹورازم کارنر دا افتتاح کیتے۔
